Шуурхай штабаас өгсөн үүрэг, даалгаврын хүрээнд иргэд, олон нийтэд Шатахуун түгээх станц (ШТС)-уудын орлого бууж байгаа мэдээлэл, шатахууны үлдэгдэл, нөөц, борлуулалтын төлөв байдлын мэдээллийг бодит, шуурхай хүргэх ажил үргэлжилж байна.

Ашигт малтмал, газрын тосны газар (АМГТГ)-аас oil.mrpam.gov.mn системээр дамжуулан мэдээллийг benzin.mn сайтад нэгтгэн байршуулж эхлээд байгаа юм. Системийн тасралтгүй, үнэн зөв ажиллагааг хангах зорилгоор ШТС-уудын мэдээллийг бүртгүүлэх, цаг тухай бүрт нь шуурхай шинэчлэх талаар аж ахуйн нэгжүүдэд шаардлага хүргүүлээд байна.

Уг ажлын хүрээнд Улаанбаатар хотод үйл ажиллагаа явуулж байгаа аж ахуйн нэгжүүдийн холбогдох ажилтан, менежерүүд болон ШТС-ын төлөөллүүдэд зориулсан "Шатахуун түгээх станцын мэдээллийн систем ашиглах сургалт"-ыг өнөөдөр буюу 2026 оны 10 дугаар сарын 21-ний өдөр зохион байгууллаа.

Сургалтаар:

• oil.mrpam.gov.mn системд нэвтрэх болон мэдээлэл оруулах зааварчилгаа,

• ШТС-ын шатахууны нөөц, орлого, борлуулалтын төлөвийг цаг тухайд нь шинэчлэх,

• Мэдээллийг benzin.mn сайтаар дамжуулан иргэдэд шуурхай, бодитой хүргэхтэй холбоотой мэргэжлийн зөвлөмжүүдийг өгөв.

Шатахуун түгээх станцын мэдээллийн систем ашиглах сургалт нь ШТС-ын автобензиний нөөцийн мэдээллийг тогтмол, үнэн зөв шинэчлэн оруулж, олон нийтийг бодит мэдээллээр хангахад чиглэж байна.