2024 оны 10-р сарын 2-5-нд Налайх дүүргийн Тайж уулын хормойд зохион байгуулагдах Mining Week x MinePro 2024 арга хэмжээнд та бүхнийг урьж байна. Уул уурхайн салбарын мэргэжилтнүүд, төрийн болон хувийн хэвшлийн төлөөлөгчид, олон улсын хөрөнгө оруулагчид, судлаачид зэрэг 5000 гаруй оролцогч энэ арга хэмжээнд хүрэлцэн ирэх юм.

2024 оны 10-р сарын 2 | Эхний өдрийн онцлох илтгэгчид

ОНЦЛОХ СЭДВҮҮД: ХАРИУЦЛАГАТАЙ УУЛ УУРХАЙ, АЖ ҮЙЛДВЭРЖИЛТ, ЭРДЭС БАЯЛГИЙН САНХҮҮЖИЛТ

Mining Week 2024 нь уул уурхайн салбарын хамгийн сүүлийн үеийн чиг хандлагыг хөндөж, хариуцлагатай уул уурхай, аж үйлдвэржилт, чухал эрдсийн төсөл, эрдэс баялгийн санхүүжилт зэрэг олон сэдвийг хэлэлцэнэ. Монгол Улс нь чухал эрдэс баялаг бүхий улс гэдгээрээ олон улсын зах зээлд улам бүр анхаарал татаж буй бөгөөд энэ нь хөрөнгө оруулагчид болон мэргэжилтнүүдийн хувьд шинэ боломж байх юм.

САЛБАР ХООРОНДЫН УЯЛДАА БА ОЛОН УЛСЫН ХАМТЫН АЖИЛЛАГАА

Энэ жилийн арга хэмжээ нь зөвхөн уул уурхайгаар хязгаарлагдахгүй, эрчим хүч, боловсрол, болон технологийн салбаруудын хамтын ажиллагааг онцолж байна. Салбар хоорондын интеграцын талаарх илтгэл, хэлэлцүүлгүүд нь уул уурхайн салбарын хөгжлийг олон салбарын хамтын ажиллагаагаар дэмжих боломжийг харуулах болно.

Мөн Элчин сайд нарын дугуй ширээний уулзалт болон Олон улсын уул уурхайн ассоциацын дугуй ширээний уулзалт нь дэлхийн уул уурхайн шилдэг туршлага, ирээдүйн чиг хандлагын талаар хэлэлцэх талбар болох бөгөөд энэ нь Монголын уул уурхайн салбарт олон улсын хамтын ажиллагааг өргөжүүлэхэд чухал үүрэг гүйцэтгэх юм.

ОНЦЛОХ АРГА ХЭМЖЭЭ: ИРЭЭДҮЙН ИНЖЕНЕРҮҮД ХӨТӨЛБӨР БА ОПЕРАТОРУУДЫН УР ЧАДВАРЫН ТЭМЦЭЭН

Ирээдүйн инженерүүдийн хөтөлбөр нь уул уурхайн салбарт мэргэжил эзэмшихийг зорьж буй оюутан, сурагчдад зориулсан хөтөлбөр бөгөөд тэднийг дэвшилтэт технологи, инженерчлэлээр мэргэшүүлэхэд чиглэгдсэн. Мөн Үндэсний операторуудын ур чадварын тэмцээн нь шилдэг тоног төхөөрөмжийн операторуудын ур чадварыг шалгаж, тэднийг үнэлэх томоохон арга хэмжээ болох бөгөөд шилдэг оролцогч дэлхийн операторуудын ур чадварын тэмцээнд оролцох эрх авах юм.

ТОГТВОРТОЙ ХӨГЖИЛ БА НОГООН ШИЙДЛҮҮД

Энэ үеэр Монгол Улсын уул уурхайн салбарыг олон улсын тавцанд нэвтрүүлэх, хариуцлагатай уул уурхайг хөгжүүлэх чиглэлээр Канадын Уул уурхайн ассоциацийн ерөнхийлөгч Пьер Граттон болон Оюу Толгой ХХК-ийн гүйцэтгэх захирал Дэйрдрэ Лингенфелдер зэрэг салбарын тэргүүлэгчид илтгэл тавина. Энэхүү арга хэмжээ нь Монголын Уул Уурхайн Үндэсний Ассоциацийн тэргүүн зорилго болох уул уурхайн салбарыг илүү хариуцлагатай, байгаль орчинд ээлтэй болгоход дэмжлэг үзүүлэх зорилготой юм.

МОНГОЛЫН УУЛ УУРХАЙН САЛБАРЫН СТРАТЕГИЙН АЧ ХОЛБОГДОЛ

Монгол Улсын уул уурхайн салбар нь улсын эдийн засгийн голлох хөдөлгөгч хүч бөгөөд ДНБ-ий 30%, экспортын 94%-ийг бүрдүүлдэг. Mining Week x MinePro 2024 нь энэ салбарын хөгжлийг шинэ түвшинд гаргах, хөрөнгө оруулалтын боломжуудыг тэлэх, салбар хоорондын уялдаа холбоог бэхжүүлэх томоохон боломж юм.

Дэлхийн уул уурхайн салбарын шилдэг шийдэл, шинэ санаачилга, техник технологийг танилцуулах Mining Week x MinePro 2024 арга хэмжээнд таныг хүрэлцэн ирэхийг урьж байна.

 

эх сурвалж: ikon.mn