Нүүрсний чанарын сургалт амжилттай болж төгсөгчид сертификатаа гардан авлаа
Монгол улсын Уул уурхайн сайдын 2014 оны тавдугаар сарын 1-ний өдрийн 88 дугаар тушаалаар Уул уурхайн яамны Төрийн нарийн бичгийн дарга Р.Жигжидээр ахлуулсан “Нүүрсний салбарын үйлдвэрлэлийн мэргэжилтэн, ажилтнуудыг давтан сургах, мэргэшүүлэх” сургалтын зөвлөл байгуулагдан ажиллаж байна.
Зөвлөлийн зорилго нь нүүрсний салбарын үйлдвэрлэлийн мэргэжилтэн, ажилтнуудыг давтан сургах, мэргэшүүлэх, салбарын хүний нөөцийн чадавхийг дээшлүүлэхэд оршино.
Дээрх ажлын хүрээнд Ашигт малтмалын газрын Уул уурхайн шинжилгээ, туршилтын лабораториос мэргэжлийн төрийн бус байгууллага болох “Монгол Нүүрс” ассоциацитай хамтран “Нүүрсний шинж чанар, боловсруулалтын талаар суурь мэдлэг эзэмшүүлэх, шинжилгээний арга, аргачлалд лаборантуудыг мэргэшүүлэх сургалт”-ыг 2014 оны тавдугаар сарын 22-ны өдрөөс эхлэн 14 хоногийн хугацаатай амжилттай зохион байгуулж дуусгалаа.
Энэхүү сургалтыг Ашигт малтмалын газрын Уул уурхайн шинжилгээ, туршилтын лабораторийн шинжилгээний багаж, тоног төхөөрөмжүүд дээр суурилан онолын болон дадлагын хичээлийг доктор болон магистр зэрэгтэй, лабораторийн чиглэлээр олон жил ажиллан мэргэшсэн лабораторийн ахлах шинжээч, шинжээч нар заав.
Сургалтанд ГЕГ-ын Гаалийн төв лабораторийн байцаагч-шинжээчид, “Эрдэнэс Таван Толгой” ХК-ийн геологичид, “Багануур” ХК, “Шивээ-Овоо” ХК, “Шарын гол” ХК, “Могойн гол” ХК, “Багануур илч” ХХК, “Нью Эко Энержи” ХХК зэрэг төрийн болон хувийн өмчит уурхай, “ТЭЦ-4” ТӨХК, Дархан, Эрдэнэт, Дорнодын дулааны цахилгаан станцийн лаборатори, “Шарын гол энерго” ХХК, “Висмутин” ХХК-ийн боловсруулах үйлдвэр, нүүрсний лабораторийн мэргэжилтнүүд, лаборант зэрэг 17 хүн хамрагдан амжилттай суралцаж төгсөв.
Төгсөгчид энэхүү сургалтаар олон зүйлийг сурч мэдсэндээ сэтгэл хангалуун байна.
Сургалтаар нүүрсний аж үйлдвэрийн салбарын өнөөгийн байдал, боловсруулах чиглэлийн зорилт, боловсруулах үйлдвэрлэлийг хөгжүүлэх ач холбогдол, нүүрсний бүтэц, найрлага, хими технологийн шинж чанар, нүүрсний шинжилгээний арга аргачлалын талаар онолын мэдлэг олгоод зогсохгүй шинжилгээний арга, аргачлалыг шинжилгээний багаж тоног төхөөрөмжүүд дээр практик, дадлагаар зааж сургав.
Төгсөгчдөд баяр хүргэж сертификат гардуулах ажиллагаа 2014 оны зургаадугаар сарын 5-ны өдөр Уул уурхайн яаманд болж сайдын зөвлөх Ч.Түмэнбаяр, тус яамны Стратегийн бодлого, төлөвлөлтийн газрын Түлшний бодлогын хэлтсийн дарга Л.Раднаасүрэн, АМГ-ын даргын үүргийг түр орлон гүйцэтгэгч Д.Үүрийнтуяа, мөн газрын Төрийн захиргааны удирдлагын хэлтсийн дарга Н.Алтанцог, Уул уурхайн шинжилгээ, туршилтын лабораторийн дарга С.Алтанхуяг нар оролцов.
АМГ-ын Уул уурхайн шинжилгээ, туршилтын лабораториос “Нүүрсний чанарын сэдэвт” сургалтыг цаашид тогтмолжуулж салбарын төрийн бус байгууллагуудтай хамтран жил бүр зохион явуулж байх юм.