Монгол Улсын эдийн засгийг үүрч яваа уул уурхайн салбарт ажиллаж байгаа эмэгтэйчүүд 2018 оноос эхлэн жил бүр тулгамдаж буй асуудлаа тодорхойлж, ойрын ирээдүйн зорилтоо дэвшүүлэн, эмэгтэйчүүдийн хөдөлмөр эрхлэлтийн болон нийгмийн асуудлыг шийдэхэд өөрсдийн дуу хоолойг төр, засагт хүргэдэг уламжлал тогтсон.  Энэ жил 2019 оны 05 дугаар сарын 03-нд Эрдэс баялгийн салбарын эмэгтэйчүүдийн үндэсний II чуулганыг Төрийн ордонд, өргөн бүрэлдэхүүнтэйгээр зохион байгуулж байна.

УУХҮЯ-наас санаачлан зохион байгуулж буй энэ удаагийн чуулга уулзалт хүрээгээ тэлж, уул уурхайн салбараас гадна  геологи, газрын тос, хүнд үйлдвэрийн салбарын эмэгтэйчүүд оролцож байгаагаараа онцлог юм. Эрдэс баялгийн салбарын эмэгтэйчүүдийн үндэсний II чуулганд төрийн болон төрийн бус, хувийн хэвшлийн байгууллагуудад ажиллаж буй эмэгтэйчүүдийн төлөөлөл болж 500 орчим эмэгтэй оролцож байна.

Чуулганыг УУХҮ-ийн сайд Д.Сумъяабазар нээж хэлсэн үгэндээ “2018 оны байдлаар уул уурхай, олборлох салбар нь дотоодын нийт бүтээгдэхүүний 24 хувь, экспортын бүтээгдэхүүний 87 хувь, улсын төсвийн орлогын 30 гаруй хувийг тус тус бүрдүүлж байна. Дотоодын нийт бүтээгдэхүүнд манай салбарын оруулах хувь нэмэр  өмнөх оныхоос 2 хувиар нэмэгдлээ.

Эдгээр эерэг үр дүнгүүд бол манай салбарын эмэгтэйчүүдийн маань хүнд хүчир ажлын талбарт эрчүүдтэй мөр зэрэгцэн ажилласан  хөдөлмөр бүтээл, гэр бүл үр хүүхдээ умартан зүтгэсэн итгэл зүтгэл, эх орон, ард иргэдийнхээ төлөө гэсэн  чин сэтгэлийн бодит илрэл, бахдам амжилт юм. Энэ бүх зүтгэл, амжилтын тань төлөө та бүхэндээ Монгол Улсын Засгийн газрын нэрийн өмнөөс, Уул уурхай, хүнд үйлдвэрийн салбарынхаа эрчүүдийн өмнөөс болон хувиасаа гүн талархал илэрхийлье” гэлээ.

Мөн тэрбээр “Ард иргэд маань эрдэс баялгийн салбарын ашигтай байдлыг ирээдүйн амьдралынхаа санхүүгийн баталгаа, сайн сайхан бүхний боломж хэмээн итгэл найдвар тавьсаар буйг бид анхааран ажиллаж ирлээ. 2019 онд манай салбар улсын төсөвт 3 их наяд төгрөгийг татан төвлөрүүлэх үүрэг хүлээгээд байна. Зөвхөн улсын төсвийн бүрдүүлэлт, улс орныхоо баялгаас ард иргэдэд ногдох хувийг шударгаар хуваарилах, ингэснээр айл өрх бүрийн амьдралын боломжийг дээшлүүлэх, бусад салбаруудыг хөгжүүлэх санхүүгийн хуримтлал үүсгэх зэрэг нэн хариуцлагатай үүргийг хүлээж буйгаа бид сайтар ойлгож байна. 

Энэхүү хариуцлагатай үүргийг нэр төртэй биелүүлэхийн тулд Засгийн газар болон манай яамны зүгээс голлох ашигт малтмалын салбаруудаа тэрбум ам.долларын эргэлттэй салбар болгон хөгжүүлэхийг зорьж байна. Тухайлбал, зэсийн салбар одоогоор 3 орчим тэрбум ам.доллар, нүүрс 2 тэрбум гаруй ам.долларын эргэлттэй байгааг зэсийн үйлдвэрлэлийн өсөлт, дэд бүтцийн бүтээн байгуулалт зэргээр дамжуулан өсгөх бүрэн боломжтой. Харин алтны салбар өнөөдрийн байдлаар 800 орчим сая.ам долларын эргэлттэй байгааг 1 тэрбум ам.доллар давсан салбар болгох, бусад 1-2 ашигт малтмалыг 1 тэрбум ам.доллар давсан салбар болгон хөгжүүлэх зорилт тавиад байна. Энэхүү хариуцлагатай үүргийг амжилттай хэрэгжүүлэхэд та бидний нэг зүгт чиглэсэн хамтын ажиллагаа хамгийн чухал юм” хэмээсэн юм.

Өнөөдрийн байдлаар уул уурхай, олборлолтын салбарт нийт ажиллагсдын 14 хувийг эмэгтэйчүүд эзэлж байна. Салбарын эмэгтэйчүүдийн холбоод болон бусад төрийн бус байгууллагууд идэвхжиж, жендерийн бодлого боловсруулах, бодлогын хэлэлцүүлэг хийх болон энэхүү чуулга уулзалтад идэвх санаачилга гарган оролцож байгаа нь “Уурхайчин эмэгтэйчүүд хөгжлийн төлөө” чуулганы үр дүнгүүд эхнээсээ гарч ирж буйг харуулж байна.